Rrustem Geci –
Dortmund, Shkurt, 2016
Historinë që unë e kam në shpinë
është histori krejt pakëz e njohur
një histori me mungesë emrash
një historie do thosha e mohuar
një histori me dhimbje të kokës
Historinë që unë e kam në shpinë
rëndë po e tronditë sot Kosovën
mbi këtë parajsë toke të gjelbërt
kam vërejtje për kohën tonë, dhe
për cenzorët që e mbajnë fshehur
Historinë që unë e kam në shpinë
rrahur ma kanë për të vërtetën
rrahur ma kanë për fitoret, dhe
rrahur ma kanë për të ardhmen
Historinë që unë e kam në shpinë
poshtruar ma kanë të mëdhenjtë
dhe në çdo pas luftë të luftërave
pjesë të tokave m´i kanë marrë
Historinë që unë e kam në shpinë
i mungojnë shkrime krejt të fillimit
librat që ne vetë i kemi shkruar
mungon gjuha e të parëve tanë
na mungon alfabeti i pellazgëve
Historinë që unë e kam në shpinë
është histori e të gjitha epokave
histori qytetëruese e atdheut tim
Historinë që unë e kam në shpinë
I ka 130 shekuj jetë të qytetarit
130 shekuj të luftave të pakryera
dhe 130 shekuj me plis të bardhë
Në këtë parajsë, Kosovë-Shqipëri
nuk ka luftë që s´e ka një pikë lot
nuk ka luftë që s´e ka një varr
nuk ka luftë që s´e ka një ëndërr!.
The Author
Atdhe Geci
Rrustem Geci është një poet i njohur. Ai u lind në Roganë të Dardanës. Mësimet e para i bëri në vendlindje, kurse shkollën e mesme e kreu në Gjilan dhe Dardanë. Rrusta u kulturua më tej në Universitetin e Prishtinës, në Fakultetin Ekonomik.
Rrustem Geci 15 vjet ishte gazetar, në Radio Televizionin e Prishtinës. Ndërsa pas mbylljes së RTP-së nga regjimi fashistoid serbian ai mërgon në Dortmund të Gjermanisë, ku edhe tani jeton e vepron.
Deri më tash ka shkruar dhe botuar 17 vepra;
1. “Demonstratat e luleve”,
2. “Antolologjia personale"
3. “Jeta në Letër”,
4. ”Mielli dhe uji”,
5. “Lirikë”,
6. “Dridhjet e barit”,
7. “Atdheu”,
8. ”Erdhëna”,
9. “Arbëreshët”,
10. “Shqipëria”,
11. “Trojet e mia” ,
12. “Rogana”,
13. “Heroika”,
14. “Gacat e prushit”,
15. “Atdhetarët”,
16. “Pasha këtë tokë”,
17. “Kanuni poetik”, libri më i vëllimshëm në gjuhën shqipe me poezi, 2 mijë faqe, dhe mbi 23 mijë vargje.
Motivet në poezinë e Gecit janë motive të zemrës dhe të shpirtit. Shndërrimi i jetës së jetuar në tekst poetik, është natyrshmëria e të qenit poet. Poezia përfiton shumë nga e bukura, nga dashuria.
Rrustem Geci është anëtar i Lidhjes së Shkrimtarëve të Kosovës, prej vitit 1995, dhe është i përfaqësuar në gjashtë Antologji me poezi, dhe në një Antologji për gazetari.