TY, TRIME SHQIPTARE…
(Bashkëshortes dhe bashkëluftëtares së Komandant SANDOKANIT, Sanije REXHA)
Me zemër i tërhoqa vijat
Për tëndin portret
Me lapsin tim-daltë
Unë poeti vetë
Në letrën prej guri
Emrin ÇLIRIMTARE
N’ballin tënd ta gdhenda
Ty, trime shqiptare
Ti je soj i Yjeve
Kënga lahutare
Lis i gjatë i pyjeve
I Alpeve Shqiptare
Melodi e fyjeve
Lulëkuqe e k’saj Toke
Kala-besa Jote
Me SANDOKANIN trim-
Bir i kombit tim
Udhëtuat gjatë
N’stuhi e shtrëngatë
Në kohë t’ turbulluar
Ishit ar-praruar
Besnike n’ flakë lufte
Shqipe dykrenore
Burrneshë me shtatë zemra-
Ti motër ARBËRORE
Si sot- dhe dikur-
Kuq e zi Flamur
Përrua i tërbuar
Me përrenjtë e shoqëruar
Kurrë s’u ndale, Trime
Me armët në duar
Ty, Motër e re
Shpresë të patëm ne
Për fillim të kohëve-
T’një epoke t’re
Sot je krenaria
Nderi ynë kombëtar
je shkëndijë trimërie
Je margaritar
Dhe gjerdan lirie
Atdhedashurie