Mbreti 5-ditësh i Shqipërisë

Otto Wite nuk dinte të lexonte dhe të shkruante , por ai u bë Mbreti i Shqipërisë për pesë ditë – nga një shaka .

Shkruan : Brilant Gashi


Nuk humbasin rrënjët tona (shkrimi #4)
 
Shqipëria dhe historia e saj është e mbushur me fakte të ndryshme historike , që kanë lënë gjurmë të pashlyeshme në gjithë historinë shqiptare , por edhe tek vet shqiptarët .
Në këtë histori , ka pasur edhe çudira të mëdha që për popullin janë të panjohura , por për disa studiues edhe nuk janë .
 
Kjo është historia e një fantazeri ose cirkuzi , i cili mendohet të ketë qenë “Mbreti” i Shqipërisë , diku në shkurtin e viteve 1913 . Personazhi i kësaj historie të habitshme quhet Otto Witte , i cili ka lindur më 16 tetor 1871 dhe vdiq më 13 gusht 1958 .
 
Që në moshën 8 vjeçare , lindi edhe talenti i tij për të fituar para duke punuar si artist dhe si magjistar . Një pjesë të madhe të jetës së tij , e kalonte si endacak duke u endur nëpër Evropë , Amerikë , Afrikë dhe në Azinë e Vogël . Në këto vite , ai punonte edhe si ekspozues , punëtor ndërtimi , kamarier , kapës kafshësh , major e shumë profesione tjera .
Mund të thuhet se ai kishte një talent të lindur për gjuhët e huaja edhe pse të lexonte nuk dinte edhe aq mirë , pasi që shkollën e ndoqi vetëm dy vjet . Gjuha turke , do t’i hynte shumë në punë sepse do të shkonte në Stamboll për 12 herë dhe do të shërbente në ushtrinë turke në vitin 1912 , ku dhe arriti të bëhej oficer dhe të gradohej edhe major . Në po këtë vit edhe Shqipëria e shpalli pavarësinë .
 
Qeveria e parë shqiptare , nuk arrinte që të zgjidhte trazirat e brendshme politike dhe pikërisht caktimi i një mbreti apo princi nga Fuqitë e Mëdha , do t’i kryente punë , duke e garantuar pavarësinë e saj . Në bisedimet e zhvilluara , përflitej emri i princit turk Halim Eddine .
 
Sipas një dokumenti të datës 21 gusht 1943 , Otto Witte ndodhej në Stamboll . Ai endej rrugëve të Stambollit dhe takon një mik që e njihte prej kohësh . Miku i tij i propozoi të futet në ushtrinë turke dhe aty , ai kryente shërbime të vlefshme si p.sh ., sigurimi i materialeve sekrete në Beograd dhe Sofje .
 
Shqipëria po shkëputej nga Turqia dhe Fuqitë e Mëdha akoma nuk e kishin caktuar mbretin e Shqipërisë , megjithëse në tërë kohën përflitej për princin turk Halim Eddine .
Ai ishte momenti kulmor , kur Ottos i lindi ideja e “çmendur” për t’u bërë mbret i Shqipërisë . Ai dërgon dy telegrame rresht në emër të princit dhe e paralajmëron shtetin shqiptar , që do të gjendej në Shqipëri mbas dy ditëve , dhe ndërkohë ai kishte marrë me qira një uniformë në Vjenë .
 
Pikërisht në datën 15 shkurt 1913 , mbërrin në portin e Durrësit , i shoqëruar edhe nga miku i tij . Nga aty , mendohet të ketë lëvizur në drejtim të Kavajës .
Telegramet , që kishin mbërritur më parë dhe ngjashmëria e tij me princin , bënë të mundur që ai të kurorëzohet me titullin Mbret i Shqipërisë . Ai dha pritje , organizoi parada ushtarake , ndërkohë që të bindurit e tij i ofruan edhe harem .
 
Bota perëndimore e mori vesh këtë gjë dhe lajmi u përhap deri në Stamboll . Sulltani u çudit tej mase , sepse ai kishte dijeni që nipi ishte në ndërkohë në pushime në Vjenë . Princi Halim Eddine njoftonte se Vjena ishte e habitur për lajmet që vinin nga Shqipëria , kështu që monarkut të rremë do t’i duhej të braktiste edhe mbretërinë e tij 5-ditëshe .
 
Kjo histori bëhet subjekti i jetës së tij të mëvonshme duke e bërë pjesë të pandashme të ekspozimeve të tij të ndryshme . Madje në vitin 1939 ai vendos t’i botoj këto kujtime në një libër të shkruar nga mbesa e tij Elfriede Witte , e cila e quan gjyshin e saj “aventurierin më të madh të të gjitha kohërave .”
 
Me sa duket nuk ka qenë vetëm Princ Wilhelm Zu Wied i vetmi gjerman që ka udhëhequr Shqipërinë dhe shqiptarët , por edhe një gjerman para tij ka pretenduar të ngjitet në fronin mbretëror . Kjo është historia e mbretit 5-ditësh të Shqipërisë .
Shperndaje ne

The Author

Brilant Gashi

Përgjithmonë Shqiptar ...

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.