LE T’JU THEME
Le t’ju them: i harruar prej zilisë,
Le t’ju them: për provë i përndjekur,
Unë bukën e bardhë të miqësisë
Në furrën e zemrës jua kam pjekur;
Le t’ju them: bukën e bardhë të diellit
Në fetëza ua ndava fëmijëve,
Dhe ujin që u lava sklepat e syve
E nxorra nga fundi i pusit të yjeve;
Le t’ju themë se gurët e bardhë të varreve
I kam lyer me llakun e hënës,
Në fletët e trëndafilit shpirtrat e të parëve
I kam dëgjuar në pëshpërimat e mbrëmjes;
Le t’ju them se gjithë natën kam qëndruar
Roje syçelur në portën e Agimit,
Në atë portë të hapur, të praruar
Ju kam lënë të gjithëve pikën e takimit.
Tiranë, 8.10.2014