*Poezi nga Kasam ShAQIRVELA,
TË UROJË PËR PAVARËSINË
(Ty Kosovë, e imja Dardani)
Besimi në Ty nuk më është shterur e shuar
dhe shpirti shpresën të ngrohtë hala ma mban
sado që kalvaret nuk të janë sosur apo zvogëluar
por shqiptarizmi na bën dritë gjallimi për ne,
ai, qëndron i ndezur sikurse një shandan…!
*
Fort mirë e di… dhe dëshira ma thot
që ke për ta uruar me gojën plot
emrin tënd të vjetër, emrin tënd të ri
ti, i lashti Dardan, i të lashtës Dardani
se zemra ime shekujve në kapërcyell
të ka mbajtur në gji me mushkëri fyell
dhe padrejtësitë e bëra ndaj teje….,
të rënda, ndër gjithë këta shekuj…
domosdo se kanë për t’u ndrequr
kanë për të udhëhequr meritueshëm
burrat e vërtetë, shqiptarët dishepuj
dhe jo më çakallë e arusha…
fshehur në male e zbuluar ndër fusha
që rrahin gjoks qysh paskan luftuar
e të tjerët paskan ndejtur fshehur
mjeranë nëpër ledhe e nëpër gëmusha
dhe pas lufte kur disa prej tyre u vranë
e shumë të tjerë që ndërruan jetë gaçepçe
mbetën ata që janë shumë të zëshëm…,tenor
luftën e bënë se paskan fletë të pashqepshme
po hiç pa mbare e pa fiqir ky i mendjes terror
ah ç’mynxyrë…, këso përralla çiliminjsh
dëgjuar i kam me dekada…..
ata që të nxorën në treg, për të të shitur fare lirë
thuan se e patën sa për të ta ditur çmimin
e kur do të tjerë, ngutshëm, po ta qepshin qefinin
ta prenë bile ngusht edhe xhamadanin
zvogëluar e shitur të vetin Vatanin…
ah këta fodullë që u veshën allafrënga
këta bastardë modern, mund t’i ndalë vetëm
një drejtësi e mirfilltë njerëzore…nëse ka?!
ku ligji do të kishte qenë ligj…,
pa hatërmbetjet dhe krushqi mizoret
të paudhin do ta vënte në pranga
dhe,… “Kuajt e Trojës”…
do t’i lironte nga parzmoret
lidhur fort do t’i mbante
në grazhdin e pabesisë…
peshqesh për tradhëtarët,
aktorët e tradhëtisë….
dhe rendi i shtetit do të vëhej
i drejtë dhe alla perendim
ku shqiptarit…, djersitur
do t’i përvishej mënga
veç kështu ecet përpara,
vetëm kështu përparon,
Ti o vendi im..!
*
Sepse, në këtë milenium mbijetese
nuk frymohet më allaturka…
por, vetëm e vetëm allafrënga,
për Liri të lënur amanet breznish,
kapjesh fort historish kthese,
prej nipi e mbese..!
