Aspirata më e madhe kombit shqiptar ishte dhe mbetët bashkimi i shtetit shqiptar, ndërsa mosgatishmëria e klasës politike të Kosovës, për bashkimin e Kosovës me Shqipërinë, është krejtësisht përgjegjësi e saj dhe aspak e BE-së.
Ismet Hajrullahu
Deklarata e Kryeministrit shqiptar Edi Rama, që Kosova mund t’i bashkohet Shqipërisë, nuk është aspak provokuese, por është krejtësisht në përputhje me aspiratat e ligjshme të popullit shqiptar dhe në përputhje me kushtetutën e Republikës së Shqipërisë. Kushtetuta e Republikës së Shqipërisë flet që në preambulën e saj “për aspiratën shekullore të popullit shqiptar, për identitetin dhe bashkimin kombëtar”.
Ndonese ne perputhje me Kushtetuten e Shqipërisë, kjo deklaratë, nga ana tjetër, është ne kundërshtim me Kushtetuten e Kosovës, e cila e pamundëson një gjë të tillë e specifikuar në Nenin 1 pika 3 te kushtetutës qe thotë: “Republika e Kosovës nuk ka pretendime territoriale ndaj asnjë shteti ose pjese të ndonjë shteti dhe nuk do të kërkojë të bashkohet me asnjë shtet ose pjesë të ndonjë shteti”. Për më keq, kushtetuta nuk mund të ndryshohet pa 2/3 e deputetëve të pakicave, si dhe një sërë ligjesh të rëndësishme nuk mund të ndryshohen pa 1/2 e deputetëve të pakicave!
Nisur nga këto fakte thelbësore kushtetuese, lind pyetja, kush është kundër Bashkimit me Shqipërinë, Kushtetua e miratuar nga vetë të zgjedhurit e popullit të Kosovës, apo BE-ja?!
Për hir të së vërtetës, duhet thene se shqiptarët në dy anët e kufirit (e që edhe sot pa ndonjë ndryshim me të kaluarën, ngel një kufi i dhunshëm), u përpoqën pas Lidhjes së Prizrenit edhe pas Pavarësisë së shtetit shqiptar, në kushte shumë herë më të vështira, për bashkimin e Shqipërisë; populli shqiptar ne Kosove nëpërmjet organizatave politike ilegale të kohës, si dhe shteti i Shqipërisë, qe në vazhdimësi e ka shprehur dhe mbështetur domosdoshmërinë e bashkimit të Kosovës me Shqipërinë, ndonëse konjukturat e kohës dhe raporti i forcave nuk lejonin veprime më të dukshme.
Rikujtojmë këtu se Plani Sekret i vitit 1980, për çlirimin e Kosovës, nën emrin e koduar “Shpërthimi”. Edhe pse ky plan nuk u arrit të funksonalizohej, megjithatë është fakt shumë domethënës, sepse është tepër i rëndësishëm në historinë e përpjekjeve të shtetit shqiptar për të bashkuar Shqipërinë.
Pavaresisht zërave të shterrur kundër bashkimit te Shqipërise, zëra qe vine nga skutat me te errta, aspirata më e madhe kombit shqiptar ishte dhe mbetët bashkimi i shtetit shqiptar, ndërsa mosgatishmëria e klasës politike të Kosovës për bashkimin e Kosovës me Shqipërinë, është krejtësisht përgjegjësi e saj dhe aspak e BE-së.
Mos-liberalizimi i vizave, nuk është tregues se Bashkimi Evropian është kundër bashkimit të Shqipërisë. Me liberalizimin e vizave dhe me anëtarësimin e Kosovës në BE , nuk zgjidhet çështja shqiptare e as problemet e mëdha sociale,ekonomike të qytetarëve të Kosovës. Këtë e argumenton rasti i Bullgarisë dhe Rumanisë që është një shembull se edhe pas kaq shumë vitesh antaresimi , ato ngelen dy shtetet më të pa zhvilluara të BE-së.
Vullneti i anëtarësimit i Kosovës në Bashkimin Evropian, është i madh, por ky fakt nuk duhet të vë në pikëpyetje vullnetin e shqiptarëve për bashkimin e Kosovës me Shqipërinë. Me një fjalë, nëse nuk kemi klleqe për të bashkuar shtetin në formën e bashkimit të Gjermanisë, pasi e ndalon edhe kushtetua dhe ndryshimin e saj e pamundesojne 2/3 e deputetëve të pakicave Kosoves, atëherë mund të organizohet një referendum për të pyetur popullin se çfarë dëshiron:
1. Të jetojë në dy shtete të ndryshme, Shqipëri dhe Kosovë; apo
2. Të jetojë në një shtet të vetëm shqiptar.
Nëse BE-ja, eshtë e interesuar që në Ballkan të ketë paqe, ajo arrihet vetëm duke baraz-peshuar forcat shqiptare dhe ato serbe. Ky baraz-peshim mund te arrihet vetëm nëse Kosova do i bashkohej Shqipërisë. Në të kundërt, Serbia si një shtet me mbështejen e pakufishme të Rusisë ekspansioniste, do ta ndjejë veten superiore, dhe si rrjedhojë stabiliteti Ballkanit, por edhe ai i Bashkimit Evropian, do të ngelin në mëshiren e Serbisë!
Perfundimisht, ashtu siç edhe dihet, shqiptarët jane ndër kontribuesit dhe mbrojtësit më të mëdhenj të civilizimit evropian; prandaj si të tillë, nuk e meritojnë të jenë një komb i ndarë në dy shtete, e për pasojë, të mbesin më të varfrit e Evropës.
