TOKË E LASHTË SA EMRI I TOKËS – poezi nga libri, “Koha e thirrjeve”
Ju që në Vjenë falët tokë t´ atdheut
dhe sajuat djepin serb në Kosovë
ju vraftë buka e pushka e Kosovës
tradhëtia me asgjë nuk mbulohet
Le të mbijë bari, le të rritën pemët
dhe s´di sa mund të gërvisht pena
tradhëtia juaj me asgjë s´mbulohet
atdheut tuaj ju i bëtë shumë keq
Tradhëtarë, ju vraftë buka Kosovës
loti i nënave nëpër dritare, fëmijët
e mbetur jetim, plaga e grave të
veja, dhe gjaku i mijëra të rënëve
Ju që në Vjenë e Bruksel falët tokë
t´atdheut, tokë të së ardhmes sonë
kundrejt favoreve në biznes e euro
tradhëtia juaj me asgjë s´mbulohet
Fol Kosovë, Kosovë e së ardhmes
s´falen tokat e lashta stërgjyshore
as toka e mija brezave të palindur
dhe as toka e lashtë sa emri i tokës!..
Rrustem Geci –
Dortmund, 2015
The Author
Atdhe Geci
Rrustem Geci është një poet i njohur. Ai u lind në Roganë të Dardanës. Mësimet e para i bëri në vendlindje, kurse shkollën e mesme e kreu në Gjilan dhe Dardanë. Rrusta u kulturua më tej në Universitetin e Prishtinës, në Fakultetin Ekonomik.
Rrustem Geci 15 vjet ishte gazetar, në Radio Televizionin e Prishtinës. Ndërsa pas mbylljes së RTP-së nga regjimi fashistoid serbian ai mërgon në Dortmund të Gjermanisë, ku edhe tani jeton e vepron.
Deri më tash ka shkruar dhe botuar 17 vepra;
1. “Demonstratat e luleve”,
2. “Antolologjia personale"
3. “Jeta në Letër”,
4. ”Mielli dhe uji”,
5. “Lirikë”,
6. “Dridhjet e barit”,
7. “Atdheu”,
8. ”Erdhëna”,
9. “Arbëreshët”,
10. “Shqipëria”,
11. “Trojet e mia” ,
12. “Rogana”,
13. “Heroika”,
14. “Gacat e prushit”,
15. “Atdhetarët”,
16. “Pasha këtë tokë”,
17. “Kanuni poetik”, libri më i vëllimshëm në gjuhën shqipe me poezi, 2 mijë faqe, dhe mbi 23 mijë vargje.
Motivet në poezinë e Gecit janë motive të zemrës dhe të shpirtit. Shndërrimi i jetës së jetuar në tekst poetik, është natyrshmëria e të qenit poet. Poezia përfiton shumë nga e bukura, nga dashuria.
Rrustem Geci është anëtar i Lidhjes së Shkrimtarëve të Kosovës, prej vitit 1995, dhe është i përfaqësuar në gjashtë Antologji me poezi, dhe në një Antologji për gazetari.
